ABŞ-da müqəddəs kitabı yandıran amerikalı da 11 illik işindən olub

11 sentyabr hadisələrinin ildönümündə Qurana qarşı təhqiramiz hərəkətlər edənlər işlərini itiriblər. İlk olaraq Avstraliyada müqəddəs kitablar olan İncil və Quranın səhifələrini cırıb siqaret düzəldən professor işdən çıxarılıb. "İncil, yoxsa Quran - hansı daha yaxşı yanır?" adlı video çarx hazırlayıb "YouTube" portalında yerləşdirən Queensland Universitetinin hüquq fakültəsinin əməkdaşı Aleks Stevartın universitetdəki işinə xitam verilib.

11 sentyabr terror qurbanlarını anma mərasimində Nyu-Yorkda Quranı cıraraq yandırmaq amerikalı Derek Fentona da baha başa gəlib. O, Nyu Cersi Rabitə ibarəsindəki 11 illik iş yerini itirib. Adıçəkilən idarənin rəsmiləri verdikləri açıqlamada "Cənab Fentonun etdiyi hərəkət işçilərimizin əməl etməli olduqları etik qaydalara ziddir. Onun işinə bu hərəkətləri üçün son qoyulub", deyə bildirilib.

Qeyd edək ki, Fenton Quranın səhifələrini cıraraq yandırmışdı. Jurnalistlərin bütün suallarını cavabsız qoyan şəxs polis tərəfindən saxlanılsa da, sonradan azad edilmişdi.