Vaşinqtonda Türkiyə ilə Ermənistan arasında münasibətlərə dair ABŞ administrasiyasının diqtəsi altında neçə gündür davam edən müzakirələrdən Azərbaycan üçün təhlükəli nəticələr əldə edildiyinə dair məlumatlar var. Türkiyənin “Cümhuriyyət” qəzetinin xəbərinə görə, xarici işlər naziri Əhməd Davuodoğlu aprelin 15-də Vaşinqtondakı Xarici Əlaqələr Şurasında çıxışı zamanı deyib ki, Ankara Ermənistanla imzalanmış protokolların həyata keçirilməsi üçün Qarabağ da daxil olmaqla, bütün ön şərtlərdən çəkildiyini deyib. Qəzet yazır ki, AKP iqtidarının rəhbərləri Amerika rəsmiləri ilə təmaslarda bir cür, ictimaiyyət qarşısında isə başqa cür danışır.
Bildirilir ki, nüvə təhlükəsizliyi sammitində iştirak adı altında Vaşinqtona gedən Türkiyə xarici işlər nazirinin əsas fəaliyyəti Ermənistan protokollarına dair danışıqlar aparmaqdan ibarət olub. Aprelin 12-dən bəri o, ABŞ dövlət katibi Hillari Klintonla iki dəfə rəsmi, bir dəfə isə qeyri-rəsmi formatda görüşüb.
Bu arada Ermənistan rəsmiləri son danışıqlarda “bəzi irəliləyişlərin” əldə edildiyi haqda danışaraq, sərhədlərin protokolların ratifikasiyasından əvvəl açıla biləcəyinə dair iddia ortaya atıblar. Ermənistandakı hakim Respublika Partiyasının sədr müavini Qalust Saakyan deyib ki, Ankara ilə İrəvan arasındakı müzakirələrdə bəzi irəliləyişlər var. O, Azərbaycan prezidentinin Türkiyə-Ermənistan münasibətlərinin ancaq bu iki ölkənin işi olduğu barədə bəyanatını xatırlatmaqla deyib ki, sərhədlərin protokolların ratifikasiyasından əvvəl açılması mümkündür. Qeyd edək ki, Türkiyə Sürix protokolları ilə bağlı Qarabağ şərti ilə yanaşı Ermənistan Konstitusiya Məhkəməsinin bu sənədlərin mahiyyətini dəyişdirən qərarından da narazı idi. Həmin qərara görə, Ermənistan Türkiyə ilə sərhədləri rəsmən o halda tanıya bilər ki, sərhədlər açıq olsun. Tərəflərin bir-birinin sərhədlərini tanımasına dair öhdəlik birinci, sərhədlərin açılması isə ikinci protokolda yer alır.faktxeber.com