"Azpetrol" şirkətinin Hacıqabul rayonu ərazisində yerləşən yanacaqdoldurma məntəqəsində baş verən partlayış zamanı ölən və yaralanan şəxslərin siyahısı açıqlanıb.

Hadisə zamanı Hacıyev Çingiz İdris oğlu (Şərur rayon sakini) və Babayev Eldar (Kürdəmir rayon sakini) həlak olub.

Hacıqabul rayon Mərkəzi Xəstəxanasından bildirilib ki, çərşənbə axşamı xəstəxanaya yerləşdirilən yaralılar bunlardır: Taleh Fərhad oğlu Əhmədov, Səidə Knyaz qızı Həmidova, Fərman Nadir oğlu Aslanov, Pərvin Elçin oğlu Məmmədov, Elnarə Knyaz qızı Həmidova (hamısı Gəncə sakinləri), Elnurə Arif qızı Məmmədova, Etibar Tofiq oğlu Səfərov, Ellada Əmiraslan qızı Kərimova (Bakı sakinləri), Naibə Şamxal qızı Quliyeva (Sumqayıt sakini), Aydan Elnur qızı İbrahimova (Samux rayonu sakini), David Rostomoviç Çoxselia (Gürcüstan vətəndaşı).

Xəstələrdən üçü - Elnurə Məmmədova, Aydan İbrahimova və David Çoxselia vəziyyətləri qənaətbəxş olduğu üçün evə buraxılıblar.

Hacıqabul-Padar avtomobil yolunun kənarında yanacaqdoldurma məntəqəsi yaxınlığında maye qaz daşıyan yük avtomobilində baş vermiş partlayış nəticəsində ilkin məlumata görə, 2 nəfər həlak olub, 15 nəfər yaralanıb, 7 avtomobil yanıb.

Səhiyyə Nazirliyi Məhkəmə-Tibbi Ekspertiza və Patoloji Anatomiya Birliyinin baş direktoru Şakir Musayev Trend-ə bildirib ki, hadisə zamanı xəsarət alan və Kürdəmir, Şirvan, Hacıqabul xəstəxanalarına yerləşdirilən yaralılar Bakıdakı yanıq mərkəzinə yerləşdiriləcəklər.

Fövqəladə Hallar Nazirliyi bu gün Hacıqabul rayonunda, Hacıqabul-Padar avtomobil yolunun kənarında yanacaqdoldurma məntəqəsi yaxınlığında maye qaz daşıyan yük avtomobilində baş vermiş partlayışla bağlı məlumat yayıb.

Məlumatda deyilir ki, yanacaqdoldurma məntəqəsinin və orada olan avtomobillərin yanması barədə məlumat daxil olan kimi nazirliyin müvafiq qüvvə və texnikası, o cümlədən 2 helikopteri hadisə yerinə cəlb edilib. Yanğın saat 15:57-də söndürülüb. Hadisə nəticəsində 4 nəfər həlak olub, 15 nəfər yaralanıb, 7 avtomobil yanıb.
Fövqəladə hallar naziri Kəmaləddin Heydərov da hadisə yerində olub.
APA-nın hadisə yerində olan əməkdaşının verdiyi məlumata görə, hadisə nəticəsində 8 maşın ∓ “İkarus” markalı avtobus, 1 benzindaşıyan maşın, treyler, “Akkord” şirkətinə məxsus yük maşını, “Qazel” markalı maşın, 3 minik maşını, böyük sahədə otlaq sahəsi yanıb.

***

Hacıqabul rayonu ərazisində baş vermiş dəhşətli partlayış nəticəsində ölən və yaralananların sayı məlum olub. Rayon prokurorluğundan verilən məlumata görə, 4 nəfər hadisə yerində ölüb. 8 nəfər ağır vəziyyətdə xəstəxanalara göndərilib. Xeyli sayda isə yüngül xəsarət almış şəxslər var.
Bu arada partlayışın bəzi təfərrüatları da məlum olub. Hadisə yerində olan hüquq-mühafizə orqanlarının nümayəndələri bildiriblər ki (Lent.az), qəza törədən yanacaqdoldurma maşınında xüsusi təhlükəli maddə - propan daşınırmış. Odur ki, partlayışın miqyası həddindən artıq geniş olub.


Məlumatda həmçinin bildirilir ki, həmin vaxt məntəqədə olan Bakı-Gəncə marşrutu üzrə işləyən “İkarus” markalı avtobus, 5 minik və 1 yük maşını tamamilə yanaraq kül olub. Hadisə yerində Hacıqabuldan və ətraf rayonlardan 10-dan çox yanğınsöndürən avtomobil və iki helikopter cəlb edilib.
“Azpetrol” da şirkətə məxsus yanacaqdoldurma məntəqəsindəki partlayışa aydınlıq gətirib.
“Azpetrol”un mətbuat xidmətinin rəhbəri Camal Zeynalov Lent.az-a bildirib ki, partlayışa səbəb olan yanacaq daşıyan maşın onların şirkətinə məxsus olmayıb: “Partlayışa səbəb olan yanacaq daşıyan maşın Bakı istiqamətinə hərəkət edirmiş. Bu zaman onun qarşısına başqa bir avtomobil çıxıb və yanacaq daşıyan avtomobilin sürücüsü qəzadan yayınmaq üçün maşını yanacaqdoldurma məntəqəsinə tərəf döndərib. Ancaq sürücü idarəetməni itirdiyindən avtomobil məntəqəyə çırpılıb və nəticədə partlayış baş verib. Məntəqəmizə və müştərilərimizə xeyli ziyan dəyib. Hazırda həmin yanacaq daşıyan maşının hansı şirkətə aid olması və ziyanın miqdarı araşdırılır”.

***

Bu gün saat 15 radələrində Hacıqabul rayonu ərazisində, Bakı-Qazax yolunun, Padarçöl kəndi ərazisindən keçən hissəsində yerləşən “Azpetrol” yanacaqdoldurma məntəqəsində güclü partlayış baş verib.

Hacıqabul rayon Polis Şöbəsindən Lent.az-a bildirilib ki, yanacaqdaşıyan maşından məntəqənin bazasına benzin vurularkən qəfil yanğın başlayıb və partlayış olub. Nəticədə yanacaq daşıyan maşın ikiyə bölünüb. Həmin vaxt məntəqədə yanacaq götürən bir neçə minik avtomobili, həmçinin içi sərnişinlə dolu avtobus alışıb. İlkin məlumata görə, 30 nəfərə yaxın yaralı var. Ölənlərin olduğu da istisna edilmir.


Yoldan keçən maşınlar dayanaraq yaralılara kömək etməyə çalışırlar. Əraziyə çoxsaylı təcili yardım və yanğınsöndürmə maşınları göndərilib.
Hadisənin canlı şahidi olan Bakı Dövlət Unversitetinin müəllimi Vüqar Zifəroğlu isə Modern.az-a məlumat verib ki, partlayış zamanı məntəqənin işçiləri ölüb: “Bizim maşın bir qədər arxada gəlirdi. Amma Gəncəyə gedən sərnişin avtobusunu yanğın tutub. Məntəqənin işçiləri həlak olublar. Avtobus sərnişinləri içində çoxlu sayda yanıq xəsarəti alanlar var”.