www.nice.az > Çap versiyası > Zahid Tağıyev - Dəniz Günəşi [Online video]

Dəniz Günəşi

Xəzərin sahilində tək dayanan bir qaya
Sevgi elanı edir çırpınan dalğalara
Tir-tir əsir yerində, ətraf donur soyuqdan
Budur o da bürünüb, dönüb bəmbəyaz qara

Qayanın üzərində dayanmısan səhərdən
Ayaq yalın durmusan qara ləpir qoyaraq
Əynində ağ qiyafə kətandandır deyəsən
Yummusan gözlərini qollarını açaraq

Dalğalanır saçların, dalğalanır həm dəniz
Külək təranəsində rəqs eləyir havada
Çırpınır üz-gözünə hərdən səssiz səmirsiz
Nəfəsin genişlənir, səksənirsən o anda

Dənizin o tayında, boylanaraq üfüqdən
Rəngi saralmış günəş qalxmaq istəmir deyən
Sən durmusan bu tayda günəşi çaşdırmısan
Bu ecazkar anları seyr eləyirəm mən

Gömülməsin torpağa xəyallarının nəşi
Əskik olmasın heç vaxt bənizinin güləşi
Mən sirli, mən sehirli, çoşqun bir dənizəm
Sənsə üfüqlərimdə gözəl dəniz günəşi