Tısbağa çanağının sirri açıldı
17 noyabr 2010. Müəllif: krik
Alimlər tısbağa çanağının necə əmələ gəldiyini aşkar ediblər. Çinin cənub-qərbində tapılan və təxminən 220 milyon yaşı olan 3 tısbağa qalığı bu sürünənlərin təkamülündəki itmiş halqanı ortaya çıxardı. Tapılan qalıqlar möcüzə nəticəsində heç bir dəyişikliyə uğramadan günümüzədək gəlib çıxmışdır. Onların üzərində tədqiqat işləri aparan alimlər çanağın necə əmələ gəldiyini aşkar ediblər. Bu vaxtadək çanağın dəri üzərində olan bərk təbəqədən əmələ gəldiyi zənn edilirdi. Ancaq tədqiqatlar göstərib ki, çanaq əslində bel sümüyü və qabırğaların aşağıdan-yuxarıya doğru genişlənməsi nəticəsində əmələ gəlib. Bel sümüyünün yüksək inkişaf etməsi nəticəsində əvvəl alt qabıq əmələ gəlib. Daha sonra isə qabırğalar inkişaf edərək üst qabığı əmələ gətiriblər.