UEFA kubokunun bombardiri Azərbaycana gəlir

32 yaşlı hücumçu ölkəmizdə oynamaq variantını götür-qoy edir.

Buxarestin “Rapid” klubundakı çıxışları ilə tanınan Mihay adını açıqlamaq istəmədiyi klubun cəlbedici təklifi ilə bağlı qərarını yaxın günlərdə verəcəyini bildirib: “Azərbaycanın bir deyil, bir neçə klubu ilə müzakirələrimiz olub. Bir neçə gün gözləyin, qərarımı açıqlayım. Hələ ki, Braşovda ailəmlə dincəlirəm”.

Peşəkar karyerasını 1996-cı ildə “Braşov”da başlayan Mihay 9 il bu komandada çıxış edib. Hücumçu bu klubda 199 matça 47 qol vurub. Bu müddətdə bir dəfə - 2000-ci ilin payızında yarım illik icarəyə verildiyi “Rapid”də 3 oyun oynayıb. 2005-ci ildə yenidən paytaxt təmsilçisinə keçən istedad 94 çempionat oyununda cəmi 20 qol vursa da, UEFA kubokunda özündən söz etdirib.

O komandasının 1/4 finala çıxdığı 2005/06 mövsümündə turnirdə 9 qol vurmaqla, turnirin ən məhsuldar hücumçusu olub. 32 avrokubok matçında 14 top vuran Buqa 2008-ci ilin yayında “Braşov”a icarəyə verilib. Ötən mövsüm 12 matça 1 dəfə fərqlənən hücumçu cari mövsümün birinci yarısını Yunanıstanın “Ksanti” klubunda keçirib. Sabah “Rapid”lə müqaviləsi bitəcək futbolçu azad agent statusu alacaq. 2006-07-ci illərdə yığmada 6 oyuna 1 qol vuran Mihay Rumıniyada “Pele” ləqəbi ilə tanınıb.