"Ginnesin Rekordları" kitabının 2011-ci il versiyası nəşr edilib. Kitabda son bir ildə qeydə alınan yeni rekordlarla yanaşı, bəzi köhnə rekordlar da təkrar yer alıb. Kitabın redaktoru Krenq Qlendayın sözlərinə görə, bu ilki nəşrdə heyvanlara daha çox yer verilib: "Heyvanlar həmişə öz bacarıqları ilə daha çox diqqət çəkirlər. Bu il də kifayət qədər rekordmen heyvanımız var".

Kitaba düşən bəzi yeni rekordlar arasında Avstraliyada yaşayan dünyanın ən yaşlı qoyunu, 1,2 metr boyu olan dünyanın ən böyük dovşanı, dilinin uzunluğu 11,43 sm olan it, dünyaya sağlam uşaq gətirən 240 kq çəkili ana və başqaları da var.

Xatırladaq ki, Ginnesin rekordlar kitabı ilk dəfə 1955-ci ildə nəşr edilib. Rekodlar kitabı 150 milyondan artıq nüsxə satışla ən çox satılan kitab rekorduna da malikdir. Kitab 100 ölkədə və 37 dildə satılır.

Qeyd edək ki, kitabda son 6 ildə rekordunu qoruyub saxlayan bir türkün də adı var. Bu, "Ən uzun burun" rekorduna sahib olan 61 yaşlı Mehmet Özyürəkdir. Onun burnunun ölçüsü 8,8 sm-dir.