Xəbər verildiyi kimi, prezident İlham Əliyev bu günlərdə Müdafiə Nazirliyində qapalı müşavirə keçirib və məlumatlara görə ərazilərin azad edilməsi üçün hazırlanan hərbi əməliyyatlar planının detalları ilə tanış olub. Həmin müşavirə isə Türkiyənin xarici işlər naziri Əhməd Davudoğlunun Bakıya səfərinin ardınca baş tutmuşdu. Belə görünür ki, Ankara ilə Bakı istər Qarabağa dair sülh prosesində atılacaq addımları, istərsə də alternativ yola əl atılması imkanlarını qarşılıqlı şəkildə razılaşdırır. Elə Davudoğlu da bildirmişdi ki, Bakıya səfərində məqsəd Azərbaycanla Türkiyə arasında sonrakı birgə addımları müzakirə etməkdir. Bu baxımdan rəsmi Bakının erməni tərəfinin güzəştə getmək fikrində olmadığını görəndən sonra sərt müharibə ritorikasına Ankara ilə məsləhətləşmələr əsasında keçdiyi bildirilir. V.Talıbovun Türkiyəyə səfəri və yüksək statusda qarşılanması da bu uzlaşmanın nəticəsidir. Belə ki, Azərbaycan Qarabağda hərbi əməliyyatlara başlayarsa erməni qüvvələrinin Naxçıvan üzərinə həmlə edəcəyi, bununla da “ikinci cəbhə” açaraq Azərbaycanı öz qüvvələrinin bir hissəsini bu bölgənin müdafiəsinə cəlb etməyə məcbur edəcəyi mümkün variantlardan biridir. Məlumdur ki, ermənilər son vaxtlar Naxçıvana qarşı iddialarını daha ucadan dilə gətirirlər. Lakin Qars müqaviləsinə əsasən Türkiyə Naxçıvanın təhlükəsizliyinin qarantı statusundadır. Ona görə də V.Talıbovu yüksək səviyyədə qəbul etməklə Türkiyə rəhbərliyi Ermənistana mesaj göndərir. Nümayiş etdirir ki, mümkün təhlükə zamanı Türkiyə Naxçıvanı qoruyacaq, öz hərbi qüvvələrini onun müdafiəsinə yönəldəcək.
Azərbaycanın Qarabağda hərbi əməliyyatlara başlaması halında Türkiyənin mümkün reaksiyası barədə ikitərəfli danışıqlarda da müzakirələr aparılıb. Məlumatlar var ki, Ankara regiondakı mürəkkəb vəziyyəti nəzərə alaraq bu hərbi münaqişəyə açıq müdaxilə etməyin və Azərbaycanın tərəfini tutmağın çətin olacağını çatdırıb. Lakin o da bildirilib ki, hərbi əməliyyatlar başlasa Azərbaycan Naxçıvanın təhlükəsizliyindən arxayın ola bilər: Türkiyə Qars müqaviləsindən çıxış edərək bu bölgəni qoruyacaq və beləliklə də “ikinci cənhə”nin açılmasını əngəlləyəcək..www.musavat.com