Bugün dünyada 400 milyon insan facebook sosial şəbəkəsində qeydiyyatdan keçib
Ünsiyyət! İnformasiya! Təbliğat! Məhəbbət!
Bir çox insan vaxtının böyük hissəsini facebookda keçirir. Ölkəmizdə də son üç ayda facebookda qeydiyyatdan keçənlərin sayı ciddi şəkildə artıb. Bu rəqəm 30 minlərdən üç ayda 350 minlərə çıxıb. Rəgəmin bir anda bu qədər artması sual əmələ gətirir.
Bəzi alimlər iddia edir ki, Facebook sosial ünsiyyət portalı bəşəriyyəti məhvə aparan yeni bir silah növüdür. Onların fikrincə belə sosial şəbəkələr insanları müasir həyatdan uzaqlaşdırır, onların beynini yuyur və robot kimi sanki özünə tabe etdirir. Ən başlıcası insanlarda mənəvi dəyərləri məhv edir.
Real həyatda insanlar dostları ilə görüşür, əylənir, xeyr və şərdə iştirak edir, ağrı-acını bölüşürlər. Buna saatlarla, hətta günlərlə vaxt sərf etmiş oluruq. Amma Facebook insanın vaxtını və ömrünü real olmayan, virtual bir "həyata" sərf etməyə təhkim edir. Bu, bir növ xəstəlikdir. Ən savadlı, ən ağıllı və müdrik insanlar da bu xəstəlikdən yaxa qurtula bilmirlər. Sosial şəbəkəsində qeydiyyatdan keçmiş və gündəlik müzakirələrdə iştirak edən insanın şəxsi həyatı tədricən ikinci plana keçir. Onu artıq real dostları, ailəsi, sevgilisi, qohum-əqrabası maraqlandırmır. Çünki, həmin insanın yeni "dostları", "sevgilisi" və "həyatı" artıq Facebook şəbəkəsində mövcuddur.
Az yaşlı uşaqların, o cümlədən yeniyetmə gənclərin Facebookda çox vaxt keçirmələri daha təhlükəli hesab oluna bilər. Çünki, onsuz da həyata yenicə qədəm qoyan bu insanlar artıq əsl həyatın məhz virtual dünya olduğuna inanırlar və tədricən virtual dünyanın sakinlərinə çevrilirlər.
Kaliforniya Universitetinin professoru İmmordino-Yanq deyir ki, insanlar Facebook kimi sosial şəbəkələrdən əldə etdikləri informasiyaları ani olaraq qəbul edir və bu zaman insana xas olan ənənəvi reaksiya nümayiş etdirmirlər. Bu tip ünsiyyət insanları bəşəri dəyərlərdən uzaqlaşdırır və heç bir halda ədəbiyyat oxuyarkən və canlı ünsiyyət qurarkən əks olunan hissləri əvəz edə bilmir. Çünki, insanlarda mənəvi dəyərlərin formalaşması üçün zaman və davamlı ünsiyyət tələb olunur.
Hətta ABŞ prezidenti Barak Obama da Facebook kimi sosial şəbəkələrindən istifadə edib seçkilərdə qalib gəlsə də, sonradan bunun zərəri barədə Amerika gənclərinə məsləhət də vermişdir: "Mən həyatda uğurlara imza atmaqda doğma atamdan ilham almışam, onunla ünsiyyətdən həvəslənib gələcəyimi qurmuşam. Çünki, həvəs, ilham, valeh olmaq, acımaq kimi hisslər - humanizmin əsas ünsürləridir. Bu hissləri yaşamaqla biz həyatda pisi yaxşıdan seçə bilirik. Lakin real həyatdan nə qədər uzalaşırıqsa, tədricən də humanizmdən uzaqlaşırıq. Facebook da real həyatdan uzaqlaşmağımıza əsas səbəbkardır."
Odur ki, indiki nəsil müəyyən mənada internet sosial şəbəkələrindən asılı olduğu halda, gələcək nəsillər tamamilə bu şəbəkələrin qurbanına çevriləcək ki, bu da bəşəriyyətin gələcəyini indidən təhlükə altına salır.
Yaddan çıxarmayın ki, milyard yaşı olan bu dünyada yaşamaq lazımdır, sözün əsl mənasında yaşamaq. Hər an dağılma ehtimalı olan yalançı dünyalara -Facebook və Twitter kimi sosial şəbəkələrinə isə çox da bel bağlamayın.