Narkotik maddələrin istifadəsinə görə bir il öncə həbs edilən repçi Hüseyn Dərya sırağa gün azadlığa buraxılıb.Onun həyat yoldaşı Sona Muradovanın verdiyi məlumata görə,həyat yoldaşı yenidən musiqi sənəti ilə məşğul olacağına inandığını bildirib.Hüseyn Dərya özü isə bildirib ki, o, narkomaniya bəlasından qurtarmaq üçün müalicəyə öz xahişi ilə göndərilib: “Mənim həbsxanada məcburi olaraq, müalicəyə göndərildiyim deyilir. Amma əslində bu belə deyil. Mən könüllü olaraq müalicə proqramına qoşulmuşdum. Bu elə bir proqramdır ki, ya həyatıma öz əlimlə son qoymalıyam, ya da bu dərd-bəladan birdəfəlik əl çəkməliyəm. Yəni məni müalicəyə kimsə zorla aparmayıb. Özüm xahiş eləmişəm ki, məni bu proqrama götürsünlər. Çünki mən 100 faizlik təminat istəyirəm”.
Qeyd edək ötən il dekabrın 2-də Daxili İşlər Nazirliyinin Baş Narkotiklərlə Mübarizə İdarəsinin əməkdaşları apardığı araşdırma nəticəsində onun üzərindən narkotik vasitə və bir ədəd qaz tapançası götürmüşdü. Onun barəsində Cinayət Məcəlləsinin 228-ci (qanunsuz olaraq odlu silah, onun komplekt hissələrini əldə etmə, başqasına vermə, satma, saxlama, daşıma və gəzdirmə) və 234-cü (qanunsuz olaraq narkotik vasitələri, psixotrop maddələri əldə etmə, saxlama və ya satma) maddələri ilə cinayət işi başlanmışdı və reper həbs edilmişdi.