Azərbaycanda doğulan hər 1000 uşaqdan 36-sı beş yaşınadək yaşamır. BMT Uşaq Fondunun (YUNİSEF) hesabatında belə deyilir. Bu, MDB ölkələri arasında o qədər də yaxşı göstərici deyil. Çünki YUNİSEF-in hesablamalarına görə, ölkəmiz uşaq ölümlərinin sayında Rusiya, Belarus, Ukrayna, Moldova, Ermənistan, Qazaxıstan və Gürcüstanı üstələyir.
Hesabata görə, ümumilikdə dünyada hər 1000 uşaqdan 65-i beş yaşınadək ölür. YUNİSEF-in məlumatında bildirilir ki, planetdə beş yaşadək 634 milyon 631 min uşaq yaşayır. Uşaq ölümü ilə bağlı ən kədərli göstərici Afrikadadır. Burada doğulan 1000 uşaqdan 132-si beş yaşınadək qalmır. Ən yaxşı göstərici isə sənayesi inkişaf etmiş ölkələrdədir (Avropa Birliyi, Norveç, İsveçrə, ABŞ, Kanada, Yaponiya, Avstraliya və Yeni Zellandiya). MDB və Mərkəzi Avropa bölgəsində uşaq ölümünün orta göstəricisi 1000 nəfərə 23 uşaqdır. Latın Amerikası və Karib hövzəsində də eyni göstərici qeydə alınıb.
Keçmiş SSRİ respublikaları arasında ən yaxşı vəziyyət Baltikyanı ölkələrdədir. Doğulan hər 1000 uşaq arasında ölüm halları Estoniyada 6, Litvada 7, Latviyada isə 9-dur. Sonrakı yerləri digər postsovet ölkələri tutur: Rusiya və Belarus-13, Ukrayna-16, Moldova-17, Ermənistan 23, Qazaxıstan və Gürcüstan-30, Azərbaycan-36, Qırğızıstan və Özbəkistan-28, Türkmənistan-38, Tacikistan-64.