Rusiyanın “Hərbi-Kosmik Müdafiə” adlı analitik jurnalı yaxın gələcəkdə regionda başlaya biləcək mümkün müharibələrə dair sensasion proqnozlarla çıxış edib. Bu ssenarilərdən birinə görə, Azərbaycan-Ermənistan münaqişəsinin yenidən alovlanması ilə başlayacaq müharibəyə ABŞ-da cəlb olunacaq, sonda regiondakı bəzi dövlətlər yox olacaq, Ermənistan isə xəritədən silinəcək və onun əraziləri bölüşdürüləcək.Sözügedən jurnal Rusiya hərbi sənayesinə bağlıdır və hərbi mövzuda nüfuzlu hesab edilir. Jurnalın hazırladığı ssenarilərdən birincisinə görə separatizm, terrorçuluq, etnik qarşıdurmalar, Azərbaycanla Ermənistan arasında münaqişə və ya bölgədə yaşayan rus əhalisinə qarşı hücumlarla başlayacaq savaşda Türkiyə, Azərbaycan və Gürcüstan bir cəbhədə yer alacaq. Onlara qarşı Rusiya-Ermənistan hərbi ittifaqı dayanacaq. Üç ölkənin 500-dən çox hərbi təyyarəsi Rusiyanı Qafqazdan uzaqlaşdırmaq, iqtisadi potensialına zərər vermək və bəzi bölgələrini ələ keçirmək üçün bu ölkənin cənub regionlarını 7-10 gün ərzində aramsız bombardman edəcək.
İkinci ssenariyə görə, bölgədəki etnik qarşıdurmalar və ya İranın islam dininə söykənən dövlətlər qurmaq cəhdlərindən sonra başlayacaq müharibədə Rusiya İran, Azərbaycan və Gürcüstanla döyüşməli olacaq. Bu müharibəyə 250-dən çox hərbi təyyarənin qatılacağı ehtimal edilir. Müharibənin məqsədlərindən birinin Xəzərdəki neft-qaz yataqlarını ələ keçirmək olacaq.Üçüncü ssenariyə görə, separatizm, terrorçuluq, itirilmiş ərazilərin yenidən qaytarılması və ya Qafqaz bölgəsində mövqelərini möhkəmləndirmək niyyətlərinin yol açacağı müharibədə Rusiyanın tək müttəfiqi Ermənistan olacaq. Qarşı cəbhədə isə ABŞ-ın dəstək verdiyi Türkiyə və Gürcüstan yer alacaq. Müharibəyə böyük ehtimalla Azərbaycan, həmçinin qismən Ukrayna, Bolqarıstan və Rumıniya da cəlb olunacaq. Rusiya ərazilərini mindən artıq Türkiyə, o cümlədən Türkiyə və Ağ dənizdən qalxacaq NATO təyyarələri bombardman edəcək. Rusiyanın hava qüvvələri bir neçə saat ərzində yox ediləcək. Ardınca quru əməliyyatı başlayacaq, Rusiyanın enerji ehtiyatlarının daşındığı marşrutlar boyu bəzi Şimali Qafqaz muxtar respublikaları ələ keçiriləcək, Ermənistan torpaqları tutulacaq və bəzi ölkələr xəritədən silinəcək.