Tələbə Qəbulu üzrə Dövlət Komissiyası iyulun 3-də 2011/2012-ci tədris ili üçün Azərbaycan Respublikası ali təhsil müəssisələrinə və tam orta təhsil bazasında (11 illik) orta ixtisas təhsili müəssisələrinə III ixtisas qrupu üzrə qəbul imtahanı keçirmişdir.

İmtahan Respublikanın 4 şəhərində - Bakıda 41, Naxçıvanda 3, Gəncədə 6, Sumqayıtda 6 binada aparılmışdır.
İmtahanın idarə olunması üçün Komissiyada operativ qərargah fəaliyyət göstərmiş, müntəzəm olaraq bütün binalarla əlaqə saxlanmış və imtahan prosesinin gedişi nəzarətdə saxlanmışdır.

Bütün binalarda imtahan təlimata uyğun şəkildə keçirilmiş, abituriyentlərin öz bilik səvyyələrini nümayiş etdirmələri üçün zəruri şərait yaradılmışdır.

Hazırda Komissiyada imtahan protokollarının və cavab kartlarının emalı aparılır. İlkin statistik məlumatlara əsasən 2011-ci ildə III qrup üzrə ərizə vermiş 32869 abituriyentdən 1813 nəfəri imtaha gəlməmişdir. Abituriyentlərdən 29 nəfəri köçürməyə cəhd göstərdiklərinə görə imtahandan xaric olunmuşlar.

İmtahandan dərhal sonra müstəqil ekspertlər tərəfindən III ixtisas qrupu üzrə test suallarının ekspertizası aparılmışdır.

Həmin gün saat 19:00-da в«Spaceв» telekanalında canlı yayımlanan “Abituriyent” verilişində TQDK-nın məsul əməkdaşları və ekspertləri tərəfindən imtahanda istifadə olunmuş sualların düzgün cavabları və test tapşırıqları ilə bağlı geniş izahat verilmişdir.

İmtahanda bütün variantlar və bölmələr üzrə istifadə olunmuş sualların düzgün cavabları və balların hesablanması proqramı artıq TQDK-nın internet saytında yerləşdirilmişdir.

Cavab kartlarının emalı başa çatdıqdan sonra nəticələr TQDK-nın internet saytında yerləşdiriləcək. Abituriyentlər imtahan nəticələri barədə məlumatı həmçinin mobil telefonla “İmtahancell” xidməti vasitəsilə öyrənə biləcəklər.