www.nice.az > Çap versiyası > Son ümid [Şeir]

Son ümid dediyin-ölümə gedən
Əsgərin çiynindən asdığı silah.
Son ümid dediyin-yamanlıq edən
İnsanın fikrində sonuncu günah.

Son ümid dediyin-ölümə məhkum
Xəstənin yenidən sağalmaq eşqi.
Son ümid dediyin- hər şeydən məhrum
Dustağın azadə qocalmaq eşqi.

Son ümid dediyin-uşaqsız kəsin
Köksünü yandıran uşaq ümidi.
Son ümid dediyin-ayaqsız kəsin
Dəmirdən düzələn ayaq ümidi.

Son ümid dediyin-sonunu görüş
Gözlərdə gəzilən sevginin izi.
Son ümid dediyin-sonuncu görüş
Ümidlə gözlənən barışaq sözü